Dünya Təhsil Kompleksində şahmat seansı keçirildi

Xəzər Universiteti Dünya Təhsil Kompleksində Azərbaycan Xalq Cümhuriyyətinin yaranmasının 100 illiyinə həsr olunmuş şahmat seansı keçirildi. Dünya Təhsil Kompleksinin təşkilatçılığı və Azərbaycan İdman Jurnalistləri Assosiasiyasının dəstəyi ilə baş tutan seansda professor Hamlet İsaxanlı, AİJA-nın prezidenti əməkdar jurnalist Eldar İsmayılov, Bakı Şəhər Gənclər və İdman idarəsinin baş məsləhətçisi Salman Əbdülov, Beynəlxalq qrossmeyster, əməkdar məşqçi Azər Mirzoyev, Avropa çempionu, Türkiyə Milli komandasının məşqçisi, Beynəlxalq qrossmeyster Nicat Məmmədov iştirak edirdilər. Seansı FİDE ustası Elşad Rzayev, Xəzər Universitetinin prorektoru İsaxan İsaxanlı, Dünya Təhsil Kompleksinin müəllimi Şəlalə Hüseynova, İdman ustalığına namizəd Nurlan Rzayev apardılar.

“Write a Book”, “Essay Writing” və “Vocabulary” yarışlarının nəticələri açıqlandı

Azərbaycan və rus bölmələrində şagirdlərin ingilis dili bacarıqlarının qiymətləndirilməsi məqsədilə şagirdlər arasında keçirilən Write a Book (Öz kitabını yaz), Essay Writing (Esse) və Vocabulary (Lüğət) yarışlarının nəticələri açıqlandı. II, III, IV, V, VI sinif şagirdlərinin ingilis dilində yazıb hazırladıqları rəngarəng kitabları onların yaradıcılıq, üslub və uşaq təxəyyülünü ingilis dilində ifadə edə bilmək bacarıqlarını üzə çıxardı. VIII siniflər arasındakı esse yarışması şagirdlərin bilik və təcrübələrini işıqlandırdı. Lügət yarışı şagirdlərin sinifdənxaric söz ehtiyatlarını zənginləşdirdi. Qaliblər I, II, III yerləri bölüşərək, diplomlarla təltif olundular.

Ingilis dili üzrə Speaking, Listening, Reading, Writing imtahanları başa çatdı

Dünya məktəbinin azərbaycan və rus bölmələrində ingilis dili üzrə Speaking, Listening, Reading, Writing (danışıq, dinləmə, oxu və yazı) imtahanları başa çatdı. Beynəlxalq standartlara əsaslanaraq şagirdlərin dil bacarıqlarının 4 mərhələ üzrə böyük summativ qiymətləndirilməsi məktəbin İngilis dili ilə Monitoring və qiymətləndirmə departamentləri tərəfindən həyata keçirildi. Ötən il məktəbə qəbul olunan və cari ildə Support (əlavə ingilis dili) dərsləri keçirilən şagirdlər il ərzində əldə etdikləri bilik və bacarıqlarının qiymətləndirilməsi üçün məktəbin digər şagirdləri ilə bərabər eyni əsasda imtahan verdilər. Dünya məktəbinə digər özəl və dövlət məktəblərindən 2018-2019 tədris ili üçün müraciət edən yeni şagirdlərə növbəti ildə də İngilis dili departamenti tərəfindən intensiv ingilis dili dərslərinin həyata keçirilməsi nəzərdə tutulur.

Dünya Təhsil Kompleksində xeyriyyə aksiyası keçirildi

İyunun 1-də Dünya Təhsil Kompleksində Leykemiya ilə Mübarizə İctimai Birliyinin iştirakı ilə 1 iyun- Uşaqların Beynəlxalq Müdafiəsi Gününə həsr olunmuş xeyriyyə aksiyası keçirildi. Leykemiyadan (qan xərçəngi) sağalan uşaqların təqdim etdiyi "Qəddar Leykoz və Cəsarətli Şahzadə" adlı tamaşa məktəblilər tərəfindən maraqla izlənildi.

DÜNYA Təhsil Kompleksində inşa yazı müsabiqəsinin qalibləri diplomlarla təltif edildilər

Mayın 25-də DÜNYA Təhsil Kompleksinin kitabxanasında Azərbaycan Xalq Cümhuriyyətinin 100 illiyinə həsr olunmuş “Bizdən sonra da Vətən var!”mövzusunda inşa yazı müsabiqəsi keçirildi. Müsabiqədə məktəbin V, VI, VII, VIII sinif şagirdləri iştirak etdilər. Müsabiqəyə təqdiım edilən çox sayda yazı nümunəri arasından qaliblər müəyyənləşdirildi. Qaliblər diplomlarla təltif edildi.

Yazar, böyük alim, professor Yaqub Əl Şaruni Dünya məktəbi kitabxanasının qonağı oldu

400 dən çox kitabın müəllifi- yazar, böyük alim, professor Yaqub Əl Şaruni Dünya məktəbi kitabxanasının qonağı oldu. Ədəbiyyatda karyerasına erkən yaşlarında başlayan yazarın əsərləri ictimaiyyət tərəfindən hər zaman böyük sevgi ilə qarşılanıb: bir çox əsərləri 16 dəfə çap edilib! 2002-ci ildə Yaqub Əl Şaruninin “Ən Gözəl Hekayələr” adlı kitabı İtaliyada Beynəlxalq Boloniya Uşaq Kitabı sərgisində “Yeni Üfüqlər” mükafatına layiq görülüb. Bu mükafat Asiya, Cənubi Amerika, Afrika və Avstraliya qitələrində ildə bir dəfə bir kitaba verilir. Bütün ömrü boyu Yaqub Əl Şaruni müxtəlif mükafatlara layiq görülüb.  Dünya məktəbində məktəblilər yazarı böyük sevği ilə qarşıladılar. Yaqub Əl Şaruni “Tülkü və canavar”, ”Hədiyyə” adlı nağıllarının qısa məzmununu həvəslə danışdı, şagirdlərlə maraqlı söhbət etdi. F.Köçərli adına Respublika Uşaq Kitabxanasının direktoru Şəhla xanım Qəmbərova, Misir Mədəniyyət və Təhsil Əlaqələri Mərkəzinin rəhbəri Əhməd Sami Elaydi də tədbirin qonağı kimi öz ürək sözlərini dedilər. Şəhla xanım həmçinin Misir Mədəniyyət və Təhsil Əlaqələri Mərkəzi ilə birgə ərsəyə gətirdikləri “Əsrarəngiz Misir nağılları” kitabı haqqında məlumat verdi. Sonda Əhməd Sami Elaydi Dünya məktəbi ilə dəfələrlə əməkdaşlıq etdiklərini vurğulayaraq bunu çox yüksək qiymətləndirdiklərini söylədi. Görüş birgə xatirə şəklillərinin çəkilməsi ilə başa çatdı.