Dünya Məktəbi 20 illik yubileyini qeyd etdi

2018-ci il dekabrın 22-də “Dünya” məktəbinin “İnciçiçəyi” konsert-konfrans salonunda məktəbin 20 illik yubileyinə həsr olunmuş təntənəli mərasim keçirildi. Mərasimdə “Dünya” məktəbi və Xəzər Universitetinin rəhbərliyi və əməkdaşları, valideynlər, ölkənin tanınmış elm, ədəbiyyat və incəsənət xadimləri - AMEA Fizika Riyaziyyat və Mexanika İnstitutunun direktoru, AMEA-nın müxbir üzvü Misir Mərdanov, texnika elmləri doktoru, AMEA-nın müxbir üzvü Rafiq Əliyev, şair Ramiz Rövşən, Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid, Xalq artisti, rəqqasə Cəmilə Bayramova, rejissor Ramiz Həsənoğlu və digərləri iştirak edirdilər. Mərasimi “Dünya” məktəbinin həmtəsisçisi, Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı açaraq, geniş nitq söylədi. 20 il əvvəl məktəbin yaradıldığı şəraiti xatırladan natiq ötən illər ərzində bu təhsil müəssisəsinin keçdiyi uğurlu və şərəfli yoldan danışdı. Qeyd etdi ki, Azərbaycanın təhsil mühitinə yenilkçi təhsil ocağı kimi daxil olan “Dünya” məktəbi uşaq bağçası da daxil olmaqla üç dildə təhsil verən təhsil kompleksi kimi fəaliyyət göstərir. 2009-cu ildə beynəlxalq IB məktəbi statusu almış, Dünya IB School adı ilə Beynəlxalq Bakalavr Təşkilatı - International Baccalaureate Organization-IBO-nun üzvü olmuşdur. 2012-2013-cü tədris ilində ölkədə “İlin ən yaxşı məktəbi” adına layiq görülmüşdür. Bir neçə il əvvəl Sumqayıtda yaradılmış “Dünya” məktəbi də uğurla fəaliyyət göstərir və Gəncədə “Dünya” məktəbinin açılmasına hazırlıq işləri görülür. Bu məktəblər kompleksinin digər uğurlarından da danışan professor Hamlet İsaxanlı çıxışının sonunda məktəb kollektivini yubiley münasibətilə təbrik etdi, ona yeni müvəffəqiyyətlər arzuladı. Sonra “Dünya” məktəbinin həmtəsisçisi, məktəbə uzun illər rəhbərlik etmiş Nailəxanım İsayevanın təqdimatında məktəb haqqında film nümayiş etdirildi. AMEA Fizika Riyaziyyat və Mexanika İnstitutunun direktoru, AMEA-nın müxbir üzvü Misir Mərdanov, Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid, Xəzər Universitetinin İdarəetmə və tələbə işləri üzrə prorektoru İsaxan İsaxanlı, “Dünya” məktəbinin ilk rəqs müəllimi olmuş Xalq artisti Cəmilə Bayramova çıxış edərək, məktəbi ölkənin təsil sistemində fərqləndirən özünəməxsus cəhətlərindən danışdılar, kollektivə xoş arzularını bildirdilər. Tədbirdə məktəbin məzunlarının təhsillərini xarici olkələrin nüfuzlu ali məktəbləridə uğurla davam etdirib başa çatdırmalarından bəhs edildi, belə məzunlardan biri olan Səməd Məmmədzadənin timsalında film nümayiş olundu. Məktəbin quruculuğunda və fəaliyyətində üzun illər və səmərəli fəaliyyət göstərmiş müəllimlərə hədiyyə təqdim olundu. Hədiyyələri məktəbin direktoru Mərufə Mədətli və onun müavinləri təqdim etdilər. Azərbaycan Təhsil Şurası sədrinin müavini Həqiqə Məmmədova məktəbin həmtəsisçisi Nailəxanım İsayevaya şuranın fəxri diplomunu təqdim etdi. Tədbirdə iştirakçılara “Dünya” məktəbinin hər bir qurumu tərəfindən hazırlanmış müzik-holl və səhnəciklərdən ibarət proqram, Xəzər Universitetinin rəqs kollektivinin çıxışı təqdim olundu. Xalq artisti Cəmilə Bayramova solo rəqslə çıxış etdi. Sonda yubiley münasibətilə böyük ziyafət verildi.

Azərbaycan Respublikasının Dövlət Bayrağı günü

Azərbaycan Respublikasının Dövlət Bayrağı günü

Dünya Məktəbində Dövlət Bayrağı Günü xüsusi təntənə ilə qeyd olundu .Dövlət himninin sədaları altında açılan tədbir şagirdlərin "BAYRAQ" rəqsi ilə rövnəqləndi.Vətən sevgisi və dövlət bayrağına olan sevgi,ehtiram məktəblilərin müstəqilliyimiz,dövlətçiliyimiz,vətənimizin bütövlüyü uğrunda xalqımızın keçdiyi keşməkeşli yola həsr etdikləri tamaşada,səsləndirdikləri şeirlərdə öz əksini tapdı.


https://www.facebook.com/pg/dunyaschool/photos/?tab=album&album_id=1936268876442891

Aplikasiya dərsi Azərbaycanın Dövlət Müstəqilliyi gününə həsr edildi

DÜNYA ANA MƏKTƏBİNİN balaca sakinləri aplikasiya dərslərindən birini Azərbaycan tarixinin ən mühüm günlərindən biri olan 18 OKTYABR – Azərbaycanın Dövlət Müstəqilliyi gününə həsr etdilər. Özlərinin hiss və duyğularını rəmzlərlə ifadə edən uşaqlar dövlət bayrağımıza olan sevgi və ehtiramlarını balaca əllərilə hazırladıqları əl işlərində ifadə edirlər…

DÜNYA ANA MƏKTƏBİNDƏ nağıl qəhrəmanları nağıl anlarını yaşatdılar

DÜNYA ANA MƏKTƏBİNDƏ dünya xalqlarının nağıllarının qəhrəmanları balacalara dünyanın ən maraqlı nağıl anlarını yaşatdılar. Hörümçək adam, Tıq-tıq xanım, Maşa ilə Ayı dərslər və məşğələlər arası balacaların görüşünə gəldilər ki, onları əyləndirsinlər. Balacalar o qədər xoşbəxt idilər ki... Başqa bir tərəfdə isə daha fərqli mənzərə vardı - sehirbazın sehirli oyunları DÜNYA ANA MƏKTƏBİNİN balaca sakinlərini rəqəmələrin, hərflərin, sözlərin sirli aləminə apardı... Sən demə hər şeydə sehr varmış...

Dünya Məktəbində Bilik Fondunun sədri ilə görüş keçirildi

17 sentyabr 2018-ci il tarixində Dünya Məktəbində Azərbaycan Respublikasının Prezidenti yanında Bilik Fondunun sədri, pedaqogika üzrə fəlsəfə doktoru, dosent Oktay Səmədovla görüş keçirildi. Məktəb rəhbərliyi, müəllimlər və yuxarı sinif şagirdlərinin iştirak etdiyi görüşdə natiq “Azərbaycan Xalq Cümhuruyyəti – Dövlətçiliyimizin bayraqdarı” mövzusunda çıxış etdi. O, Azərbaycanda insan kapitalının formalaşmasının zəruriliyindən söhbət açaraq, müasir dövrümüzdə - 21-ci əsrdə dünyada gərginlik yaşandığı zanmanda bilikli, savadlı, öz milli-mənəvi dəyərlərinə, dövlətinə, vətəninə sadiq vətəndaşların çoxalmasının vacib olduğunu vurğuladı. “İnsan kapitalı zəngin, məhsuldar, cəmiyyətə vacib məfhumdur” – deyən sədr təhsilə, savada yiyələnmənin vacibliyini qeyd edərək sədr Oktay Səmədov “ömür boyu təhsil” prinsipini irəli sürdü. Azərbaycan Xalq Cümhuriyyəti dövründən söz açan alim, həmçinin bu dövrün indiki Azərbaycana verdiyi böyük töhfələrdən danışdı. O, qədim dövlətçilik ənənələrinə söykənən ölkəmizin bugünkü inkişafından söz açdı, dünyada baş verən proseslərin, gərgin hadisələrin fonunda ölkə başçısına dəstək olmağımızın, ölkəmizin daha da möhkəmlənməsi istiqamətində bilik, mükəmməl təhsil və savadla çalışmağın qarşıda duran vəzifə olduğunu söylədi. Rəhbərlik etdiyi “Bilik Fondu”nun işinin birbaşa maarifləndirmə olduğunu deyən natiq müasir texnologiyalardan istifadə etməklə bərabər, ilk növbədə, kitab oxumağın, mütaliəyə marağın artırılmasının, alimlər, təhsil işçiləri ilə əlaqələrin möhkəmləndirilməsinin ən mühüm və ümdə işlərdən biri olduğunu bildirdi. Oktay Səmədov İnformasiya burulğanı içində gərgin həyat yaşadığımız müasir dövrdə belə görüşlərin tez-tez keçirilməsi zəruriliyinin səbəbinin canlı ünsiyyətdə olmasını dedi. Çıxışının sonunda Oktay Səmədov Dünya Məktəbində təhsil üçün yaradılan şəraitdən razılığını bildirdi. O, məktəbdəki mühiti yüksək dəyərləndirərək, dərsin quruluşunun, tənəffüs zamanı istirahətlərin maraqlı prinsiplər əsasında təşkilinin nəfis tərtibatla hazırlandığını xüsusi olaraq qeyd etdi

Sumqayıt Dünya məktəbində yeni dərs ilinin açılış tədbiri keçirildi

14 sentyabr 2018-ci il tarixində Sumqayıt Dünya məktəbində yeni dərs ilinin açılış tədbiri keçirildi. Məktəb rəhbərliyi, şagird-müəllim-valideyn kollektivinin birgə iştirakı ilə keçirilən tədbir Xəzər Universitetinin tələbələri və Dünya məktəbinin şagirdlərindən ibarət rəqs qrupunun təntənəli çıxışları ilə bəzəndi. Təsisçi, professor Hamlet İsaxanlı bu günü təhsilin bayramı adlandıraraq, təhsil günü münasibəti ilə hamını təbrik etdi. Alim qloballaşan dünyada həm öz xalqının musiqisini, ədəbiyyatını, mədəniyyətini gözəl bilən,həm də dünyanı yaxşı başa düşən, insanların bərabər olduğunu dərk edən şagirdlərin yetişdirilməsinin zəruri olduğunu vurğuladı. Hamlet İsaxanlı bunun üçün beynəlxalq təhsil proqramlarının tərtib olunmasının və beynəlxalq dillərə üz tutmağın vacibliyini qeyd etdi. Sumqayıtın Azərbaycanın üç böyük şəhərindən biri olduğunu bildirən alim Sumqayıt Dünya Məktəbində ən güclü pedaqoqların toplaşdığını və məktəbdə şagirdlərin güclü təhsil almaları üçün hər cür şərait yaradıldığını və bu şəraitin daha da genişləndiriləcəyini dedi. Əllərində gül dəstələri ilə məktəbə ilk qədəmlərini qoyan birincilər, valideynlər xüsusi maraq və həvəslə məktəblə daha yaxından tanış oldular.

1-ci siniflərin “Məktəbdə ilk günüm” adlı açılış tədbiri keçirildi

Sentyabrın 13-də 1-ci siniflərin “Məktəbdə ilk günüm” adlı açılış tədbiri keçirildi. Məktəb rəhbərliyi, müəllimlər,1-ci sinfə ilk qədəmlərini qoyan balacalar və valideynlərin iştirakı ilə keçirilən bu bayram tədbirində sevinc, təntənə, kövrək duyğular, gözəl musiqilər və rəqslər bir-birinə qovuşdu. Öncə məktəb haqqında film nümayiş etdirildi, daha sonra təsisçi, professor Hamlet İsaxanlı çıxış edərək hər bir uşağın gələcəyində, onun inkişafı və zövqünün formalaşmasında təhsil aldığı məktəbin xüsusi əhəmiyyət kəsb etdiyini vurğuladı. Dünya Məktəbinin Xəzər Universitetinin nəzdində fəaliyyət göstərdiyini qeyd edən alim həmçinin bildirdi ki, məktəbin 3 – Azərbaycan, ingilis, rus bölmələrindən ibarət olması onun üstün, mütərəqqi cəhətlərindən biridir. Professor Hamlet İsaxanlı 1-ci sinfə gedən balacaları və valideynləri təbrik edərək Dünya Məktəbinin bir tərəfdən dünya vətəndaşı, digər tərəfdən dünyanı başa düşən hərtərəfli Azərbaycan vətəndaşı yetişdirdiyini qeyd etdi.